Carcerem in Guantanamo destruendum esse

Segretarius generalis ONUs (Ordinis Nationum Unitarum) numquam ita rectoribus USAe oppositus est: nam Iovis die, postquam quinque studiosi, quibus investigandi munus commissum erat, de condicionibus captivorum in carcere Guantanami rettulerunt, Kofi Annan narratione perlecta se illis omnino consentire adfirmavit, id est carcerem Guantanami quam celerrime destruendum esse, tormentis et inhumanitati finem imponendum esse, omnes denique captivos ante libera tribunalia deferendos quibus ex iure iudicentur.

Tametsi quinque indagatores ONUs iamdiu facultatem carceris visitandi et cum captivis colloquendi ex auctoritatibus USAe petiverant, numquam eo ingredi potuerunt: quibus tantum singulis singulo die sub oculis custodum carcerem inire licuisset, neque cum captivis absentibus custodibus sermonem habere. Multa gravia in narratione illa, testificationibus tantum captivorum iam dimissorum et patronorum confecta, inveniuntur: Nam in carcere Guantanami, in extrema regione insulae Cubae, fere quingenti captivi in vinculis habentur, plerique anno bismillesimo primo in Afganistania deprehensi, nullius rei incusati neve in ius umquam delati. Quos narraverunt quinque indagatores Talebanos vel Talebanis proximos ab Americanis reputatos ad arbitrium libertate orbatos, acerbe custoditos, feras et inhumanas quaesitiones passos, religionis causa iniuriis affectos esse.

Iam responderunt moderatores USAe nullius momenti se scriptum illud facere, quod numquam indagatores ipsi loca inspexissent; qui se negaverunt ita, ut rectores USAe constituissent, se carcerem visitaturos esse. Scriptum a Consilio ONUs ad iura humana tutanda vere accurate perlegendum est, deinde Consilium Securitatis, ubi USA intercedendi iure fruuntur, de re deliberavit.

Scripsit Herimannus Novocomensis