Annus
2 0 0 6


Decennis octavo necnon nono praeteriti saeculi inter economiae mundanae peritos iocose dicebatur Brasiliam iam iam in limine celerrimi

BRASILIANORUM REVOLUTIO SACHAREA

Decennis octavo necnon nono praeteriti saeculi inter economiae mundanae peritos iocose dicebatur Brasiliam iam iam in limine celerrimi incrementi stare et... semper ibi mansuram esse. Sequentibus tamen annis nonagesimis oeconomia huius terrae sine dubio robustius evolvere coepit, terraque ipsa titulum "tigridis" regionis Americae Meridionalis - instar "tigridum" Asiae Orientalis - sibi allexit. Anno tamen exeunte 2002, cum ex suffragiis praesidentialibus victor inopinate evasisset candidatus sinistrae partis Luiz Inacio "Lula" da Silva permagna exspensa socialia pauperibus promittens, oeconomistae maximo cum pavore de futuro statu rerum cogitabant. At hodie si paginas actorum diurnorum "The Wall Street Journal" aperis, invenies pretia syngrapharum societatum Brasilianorum, praeter Russorum, maxima cum celeritate in mundo crescentia! Indices enim 52 ultimarum septimanarum, quae ad societates maximi momenti cuilibet terrae spectant, docent Russos hoc tempore gradu 123.9% crevisse, Brasilianos autem 66.7%. Si tamen ad solum annum 2006 spectes, invenies Brasilianos nunc celerius etiam quam Russi crescere; hi enim ab initio anni incrementum 18.7%, illi 18.8% monstrant (secundum data die 10 Februarii publicata).

Quid fit? In casu Russiae responsum est: methanium (gasium naturale, petrogasium). Pretia petrolei iam per nonnullos annos "ferociter" crescentia, annis 2004-2005 methanium, minime adhuc carus, tandem sequi coepit, at Russia maximam in orbe terrarum copiam "caerulei" huius alimenti ignis possideat - 27.6% totius mundi (secundum "Oil and Gas Journal"). Quid tamen habent Brasiliani? Haud parvum repositum petrolei, quod tamen ipsis tantum satis est. Quid insuper? Cannam sachaream, quae imprimis responsalis est pro optima recens statu oeconomiae Brasiliae! Ne credas tamen, lector care, mundum statim ita sacharo delectare coepisse, ut desiderium eius tam magnopere cresceret. Petitum non est sacharum ad edendum, sed ad... vehendum! Est enim ultimis in annis e cibo tantum in optimum alimentum ignis transformatum. Quod praesidens USAe nunc demum polliceri suis incipit, nempe conversionem e petroleo ad alia combustibilia (inter quae et e plantis facta), Brasiliani modo attigerunt: ethanolium e sacharicanna expressum comburentes iam 18% vehiculorum huius terrae vehuntur. Et numerus hic in dies fere crescit...

Programma conversionis e petroleo in ethanolium regimen iam anno 1975 coepit, sacharum tamen ad eius fabricationem necessum semper maiori pretii fuit quam petroleum, ergo solis maximis subsidiis publicis res pergi poterat. Ultimis tamen annis petroleum iam tantopere carum factum est, ut fabricatio combustibilis ethanolis e sacharicanna operae pretium sit.

Ethanolio magis magisque oculos mundi alliciente, crescit etiam pretium ipsius sachari (anno 2005 in medio 37.1% in foris mundanis). Praesentientes revolutionem in orbe alimentorum ignis mercatores magnas copias sachari puri in bursis pro futuro usu emantur. Ut dixit actis "The Wall Street Journal" Michael Overlander, rector domus negotiatoriae commoditiorum Sucden U.K.: Omnis quisque necnon mater eius hodie sacharum album emit!

Ita - aiunt conservatistae occidentales - in Americali Meridionali crescit numerus terrarum, ubi plus minusve insanis tyrannis sinistrae partis aliquod donum naturae maximi momenti praesto adsint: modice insanus "Lula" canna sacharea fruitur, aperte mente capti Evo Morales (praesidens novus Boliviae) petrogasio at praesertim coca apud Indianos abunde crescente necnon Hugo Chavez (praesidens Venetiolae) copiis ingentibus petrolei dominationem USAe in regione fortius fortiusque aggreduntur. At in vicina Cuba, dictatore Fidele Castro, praeter tabaccum in mundo optimum silvae verae sacharicannae crescunt, adhuc ad sachari edenedi tantum fabricandum adhibitae. Ne simus tamen nimis apocalyptici...

Scripsit Nanompouphos



Retro ad:

Novissima editio
Summum paginae