Benedictum XVI papam primas litteras encyclicas in lucem edidisse

Die 25. mensis Ianuarii primae Benedicti XVI papae litterae encyclicae, quae Deus caritas est inscribuntur, Romae in lucem editae sunt. Benedictus XVI eas iam mense Decembri Germanice confecit, sed propter quasdam interpretandi difficultates editio iterum atque iterum dilata est.

Litterae divisae sunt in partes duas, quarum altera est de amoris in creatione et salutis historia unitate, altera de caritate christiana. In parte prima Benedictus XVI de duobus amoris nominibus erotis, i.e. concupiscentiae amor, et agapes, i.e. amor benevolentiae, disserit demonstratque erota et agapen non esse seiungendas, immo amorem unicam rem esse, variis quamvis cum aspectibus. Ita eis respondet, qui tamquam Fridericus Nietzsche philosophus Germanicus religionem christianam ipsi eroti, qui, licet eo non moreretur, impulsum acceperit, ut in vitium corrumperetur, venenum bibendum dedisse dicant. Sed erota rem vitae pulcherrimam purificatione indigere dicit, nam erota ad merum sexum deiectum mercem aliquam evadere, rem nudam, quam emi liceat vendique, hominem vero ipsum fieri mercimoniam. Quibus expositis altera in parte christifideles admonet, ut caritatem exerceant.

Litterae encyclicae a multis hominibus laudatae sunt. Carolus Lehmann ecclesiae Romanae cardinalis et praeses concilii episcoporum Germanorum dixit Benedictum XVI rem acu tetigisse. Quin etiam critici, velut Joannes Kueng, litteras laudant, sed verba facta secutura esse sperant. Benedictus quidem papa nos non primum stupefaceret ...

(Videte etiam textum Geronis Weishaupt sub rubricam varia - religio inseritum)

Scripsit Stefanus Weise Halensis