Osama bin Laden novas caedes praenuntiare

Rete televisificum Arabicum Al Jazeera oratiunculam trium minutarum sine imaginibus Osama bin Laden, supremi ducis gregis terroristarum Al Qaeda, die XIX mensis Ianuarii per orbem diffusit; postremum paulo ante Kalendas Ianuarias anni praeteriti eodem modo allocutus erat, Abu Musab al-Zarqawi ut ducem summum Al Qaeda in Iraquia praebens.

Osama bin Laden novas caedes terroristicas in USA paratas esse nuntiavit, quarum effectus omnes conspicient; similia de civibus Europaeis anno MMIV idem Osama dixerat.Simul longas indutias equis condicionibus obtulit, quod se populumque suum Deus post terga quemquam icere ac mendacia proferre vetaret: libenter Al Qaeda civibus Americanis, qui recessum copiarum ex Iraquia et Afganistania postulant, ad respondendum ita promptam esse, ut ambae civitates restituantur et potentes armorum mercatores profligentur. Confirmavit denique dux terroristarum insidias contra USAm fere paratas esse gregemque Jihad appellatum optime valere: victoriam sub manibus esse.

Vesperi dixit Supremum Intelligentiae Institutum USAe (C.I.A.) vocem per televisionem diffusam re vera ad Osama bin Laden pertinere.

Scripsit Herimannus Novocomensis