d.01. m.Ian. a.2006
01
d.01. m.Ian. a.2006
INFORTUNIUM LABINAE NIVALIS
Mulierem decidisse per 150 metra – et mansisse superstitem
Superstes ferêque inviolata evasit quaedam mulier, cum decidisset in fauces montium. Eadem 29 annos nata quamquam deciderat per 150 metra, effectu nivis appulsa est sat molliter.
Hinterstein ex oppidulo Bavarico prope Campodunum sito. Haec mulier heri post meridiem prope Hinterstein (in Bavariâ) in faucibus montium est inventa et servata. Hodie astynomi Campodunenses rettulerunt mulierem 29 annos natam e Badenio-Virtembergâ oriundam unâ cum amico migrasse ad casam montanam, ubi celebrarent Diem Silvestri (i.a. anni ultimum), cum subito in altitudine 1700 metrorum labina nivalis solveretur. Molibus nivium mulierem per 150 metra detractam esse in fauces montanas, ubi obrueretur nive sesquialterum metrum altâ. Eiusdem comes telephono mobili arcessivisse siphonarios et vigiles montanos. Semihorâ post mulierem esse servatam et helicoptero ad nosocomium Campodunense allatam.
Hanc relationem d. 01. m.Ian. a.2006 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: ///www.leolatinus.com/
Scripsit Nicolaus Gross
|
