Benedictum XVI. ad nativitatem Christi benedictionem Apostolicam urbi et orbi impertivisse

Die 25. m. Dec. Benedictus XVI. ex podio basilicae Vaticanae more tradito fideles ad festum natalem Jesu Christi allocutus est. Papa dixit periculum esse, ne homo aetatis technologicae sine ductu spirituali suis ipsius fructibus intelligentiae et effectibus factorum suorum periretur. Itaque homo modernus ille adultus quidem, sed interdum cogitatione et voluntate infirmus se infanti Bethlehemensi commendaret necesse esse. Nam infantem hunc homini satis boni animi afferre ad novum ordinem mundi, qui iustis relationibus ethicis et oeconomicis nititur, propagandum. Praeterea Benedictus XVI. postulavit, ut homines, quippe qui familia essent, collaborarent, ut multa et sollicita problemata nostrorum temporum tollerent. Nominavit imprimis terrorem, paupertatem, apparatum bellorum, inquinationem naturae, morbos perniciales, quos hominem imminerent. Sed omnium caput pacem esse dixit, qua Africa, Terra Sacra, Iraquia, Libanus, paeninsula Coreana etiamnunc carerent. Deinde benedictionem Apostolicam Urbi et Orbi impertivit. Haec benedictio omnibus praesentibus vel televisorio spectantibus vel radiophono audientibus coniuncta est cum remissione omnium peccatorum.

Benedictio Apostolica Urbi et Orbi in medio aevo exorta a papa tantum post electionem et ad nativitatem Christi et die dominico paschali adhibetur. Formula autem urbis et orbis iam temporibus antiquis nota fuit. Cicero, Ovidius, Plinius ea usi sunt. Nam Romani urbem Romam cum orbi terrarum eodem loco et numero habebant. Sed inde a saeculo XIII. ecclesia eam suscepit. Itaque papa, postquam electus est, insignia accepit verbis his: ut praesis urbi et orbi. Praeterea basilica Lateranensis titulo omnium urbis et orbis ecclesiarum matris et capitis ornata est.

Verba benedictionis sunt haec:

Sancti Apostoli Petrus et Paulus, de quorum potestate et auctoritate confidimus, ipsi intercedant pro nobis ad Dominum. Amen.

Precibus et meritis beatae Mariae Virginis, beati Michaelis Archangeli, beati Ioannis Baptistae et sanctorum Apostolorum Petri et Pauli et omnium Sanctorum misereatur vestri omnipotens Deus et dimissis omnibus peccatis vestris perducat vos Iesus Christus ad vitam aeternam. Amen.

Indulgentiam, absolutionem et remissionem omnium peccatorum vestrorum, spatium verae et fructuosae paenitentiae, cor semper paenitens et emendationem vitae, gratiam et consulationem sancti Spiritus et finalem perseverantiam in bonis operibus tribuat vobis omnipotens et misericors Dominus. Amen.

Et benedictio Dei omnipotentis, Patris et Filii et Spiritus sancti descendat super vos et maneat semper. Amen.

Scripsit Stefan Weise Halensis