Pontifex maximus: Aderit semper Latinitatis ubique cultoribus favor perpetuus noster

Benedictus XVI. hoc ipso anno papa electus die 28. m. Nov. in congressu Operis Fundati, quod Latinitas appellatur, oratiunculam de lingua Latina habuit. Dixit sibi usum linguae Latinae, quam a pueris iam diligeret, in vita sua usque ad electionem tum in theologiae studiis, tum in Apostolicae Sedis longinquo ministerio cotidianum fere fuisse. Itaque sibi placere etiam nunc linguam Latinam adhibere, ut pro viribus omnes ad litteras Latinas tam antiquas quam recentiores, tam saeculares quam sacras, omni cultu ac fervore non tantum adservandas, verum etiam novis rationibus docendas et inter iuniores potissimum propagandas cohortetur incitetque. Praeterea pontifex maximus adhortatus est, ut linguae Latinae consuetudinem in Ecclesia corroboraretur atque in ritibus et disciplinis ecclesiasticis inculcaretur, ne infiniti eorundem monumentorum thesauri perirent neve huius instrumenti praestantissimi usus evanesceret. Ad extremum promisit Latinitatis ubique cultoribus semper favorem suum perpetuum, animum propensum et supernum pariter Dei lumen affore.

Opus Fundatum Latinitas a Paulo VI. papa per chirographum, quod Romani sermonis inscribitur, conditum est anno 1976. Scopus eius est studium linguae ac litterarum Latinarum, classicarum quas dicunt in primis, tum etiam scriptorum christianorum nec non Latinitatis medii aevi et recentioris adiuvare et usum sermonis Latini tam in epistularum commercio quam in libris Latine conscriptis, praesertim in rebus ad cultum ingenii in Ecclesia pertinentibus vel etiam in catholicis studiorum sedibus disseminare. Quod ut efficiat, Opus Fundatum Latinitas quotannis certamen Vaticanum parat, quod in opusculis prosa vel astricta oratione compositis versatur. Hoc anno etiam Stanislaus Tekieli redactor noster et Martinus Freundorfer poeta ingeniosus victores discesserunt. Praeterea quater in anno commentarii, qui Latinitas inscribuntur, ab operis administratoribus Latine eduntur.

Ante Benedictum XVI. papam, qui iam primum post electionem nuntium Latine dixit, imprimis Ioannes XXIII. papa in constitutione Apostolica, cui titulus est Veterum sapientia, de sermone Latino splendide disseruit. Tamen paulo ante episcopus quidam asiaticus a collegiis reprehensus est, quod in episcoporum congressu lingua Latina usus erat.(Cf. fasc. 69)

Orationem totam invenies sub inscriptione hac:

www.vatican.va/holy_father/benedict_xvi/speeches/2005/documents/ hf_ben_xvi_spe_20051128_latinitas_lt.html

Constitutionem Apostolicam sub inscriptione:

www.vatican.va/holy_father/john_xxiii/apost_constitutions/documents/ hf_j-xxiii_apc_19620222_veterum-sapientia_lt.html

Scripsit Stefan Weise Halensis