De millesimo capitis condemnato in USA

Veneris die Kenneth Lee Boyd, vir LVII annos natus, mortem obiit ut millesimus in USA capitis condemnatus, postquam anno MCMLXXVI facultas capite damnationis adhibendae in illa potenti confoederatione restaurata est: re vera duodequadraginta tantum civitates USAe poenam capitis in legibus suis inserere constituerunt. Omnes, qui tantam poenam ut "rei publicae homicidium" abolendam censent, vehementer contra rectores Civitatum Americae Unitarum per fora et vias reclamaverunt, ut in imagine aspicitur. K. L. Boyd, belli Vietnamensis veteranus, immoderato alcoholis potu aeger, mulierem et socerum occiderat, testibus duobus liberis; quem anno MCMLXXXVIII iudex capite condemnavit. Arte convinctus, mortifera iniectione trium venenorum confecta in "cella mortis" carceris urbis Raleigh, in Carolina Septemtrionali, punctus est.

Plerique iniustum et vanum reputant, quod potentissima res publica totius orbis poenam capitis exercere pergat. "Humanum genus passum retrogradum hodie fecit" ait Veneris die Clive Stafford Smith, Americanus iam diu poenae capitis adversatus. Regnum Coniunctum, hodiernus praeses Unionis Europeae, opinionem omnium XXV civitatum referens talem poenam feram et inhunamam appellavit: nec quemquam a facinoribus perpetrandis deterrentem: ceterum nullo modo iudicum sententiis, quae verae non fuisse post supplicium probentur, remedium afferri posse. Praeses denique Gregis Kenyani pro hominum iuribus, Maina Kiai, in lucem protulit, plerosque condemnatos in USA nigro colore vel miseros esse: quod magnae sollicitudinis omnibus esse debet.

China, Persia et Vietnam USAm suppliciis quotannis de reis sumptis superare constat.

Scripsit Herimannus Novocomensis