De recentibus factis Iraquiae

A mense Augusto, cum XIV milites unusque interpres in oppido Haditha perierant, numquam tanta caedes militum Americanorum uno die evenit. Dum Veneris die copiae exercitus USAe pedibus apud urbem Fallujah explorant, pyrobolus dirupit: decem milites dilacerati vitam amiserunt, undecim vulnerati sunt, quorum septem - ita superbe communicatum est - officium suum statim resumpserunt. Saturni die rete televisificum Arabicus Al-Jazeera imagines huius aliarumque diruptionum et caedium diffusit.

In eadem regione Occidentali Iraquiae Al-Anbar appellata, ubi ante annum unum urbs Fallujah armis chemicis expugnata est, milites Iraquici et Americani,quibus armati rebelles saepe insidiantur, crebris expeditionibus rebelles eradicare conari coeperunt: pro certo enim habent indagatores per regionem vallis Euphratis fluvii, Syriae proximam, viros et arma ad seditionem alendam transire.

Sed Institutum Washingtonianum de Oriente Medio (Washington Institute for Near East Policy) nullam spem pacis libro nuper edito nuntiat: quamquam milia rebellium occisa, dena milia in vincula coniecta sint, si cruorem a rebellibus adhuc effusum consideres, nullum dubium esse, quin seditio fortior et scelestior facta sit; similia verba edita sunt in commentario actorum diurnorum "New York Times". Caedes cotidianae non intermittuntur, obsides inermes eripi iterum coeperunt, praeses Bush se (milites a se missos) Iraquiam usque ad victoriam non deserturum.

Scripsit Herimannus Novocomensis