Lenin a mortuis surrexisse

'Larva Europam perlustrat' - his verbis illud scriptum celeberrimum partium communisticarum incipit. Sed quis tum fuit, qui putaret illa verba hoc ipso anno 2005 vera evasura esse. Nam in museo, quod est in urbe Russica Samara, larva Leniniana esse dicitur. Maia Obraszova, quae museo praeposita est, diurnariis retulit noctu gradus in museo audiri, quin etiam semel lectum camerae Leninianae mane usum inventum esse, quamquam fores totam noctem obseratae fuissent. Aliud quoque indicium esse, quod interdum in museo placentam malorum oleret, quippe quam Lenin valde amavisse nemo esset, qui nesciret. Sed Obraszova confirmavit se et collegas suas nullo modo timere, immo se larva, quaecumque esset, amica uti, cum in omnibus aedibus veteribus larvam esse deceret.

Nos ei libenter credimus, cum et Plinius et Plautus non abhorruerint, quin nobis mostellarias praeberent (Plin. ep. 7,27; Plaut. Most.)

Scripsit Stefan Weise Halensis