Saddamus diluculo interfectus est

Quarta vigilia Saturni die occisus est Saddamus Hussein, quondam dictator Iraquiae: imagines primum per televisionem Iraquicam, postea totum in orbem diffusae virum superbum ostendunt, capite elato mortem subiens. Filia eius postulavit ut corpus in Yemenia sepeliatur, sed tribus ipsius Saddami corpus in regione Sunnitarum, ubi ipse natus erat, honorari mavult. Funera, muslimorum more, postridie obitus diei habenda sunt. Bagdati et in regionibus Shiitarum iubilatum est, sed iam numerantur victimae iratorum Sunnitarum, qui Saddamum ut legitimum praesidentem colebant: quinque et triginta Kufa, quinque et quadraginta Bagdati, centeni vulnerati, dimicationes Ramadi. Extrema damnati verba haec fuerunt: "concordes manete et periculosae societati Persicae (quo verbo ipse factiones Shiitas significat) diffidite!" .

Scripsit Herimannus Novocomensis