De commutatione apud Fidzienses (Fiji)

Dux Franciscus Bainimarama (quem in imagine aspicis) summam rerum vi in Insulis Fidziensibus sumpsit: quarta haec rerum commutatio a XX annis in insulis illis ita facta est. Minister primarius Laisenia Qarase ita officio remotus est, corruptionis a novo domino accusatus.

Commutatio a Don McKinnon, secretario generali "Salutis communis" (Commonwealth), damnata est, qui Insulas Fidzienses a societate illa expelli posse nuntiavit: de qua re ministri rebus exteris addicti Londinii post paucos dies disputabunt. Australiae et Novae Zelandiae legati Insulas poena afficiendas esse censent. Dominus Jona Senilagakali ad tempus minister primarius a Francisco Bainimarama factus est, donec nova suffragia aliquando habeantur.

Viae et fora a militibus crebrioribus nunc occupantur. Andreas Hughes, qui usque ad hunc diem dux astynomorum fuerat, novum regimen rei publicae praesidenti, astynomis, ecclesiis, optimatibus totique populo ingratum esse dixit: ipse mox in Australiam migrabit. "The Fiji Times", maxima insularum acta diurna, editiones suas desinent, dum interdicta non tolerentur. Sed non desunt Fidzienses, qui novos moderatores civibus ex India oriundis iura legitima demum agnoscere posse reputent.

Scripsit Herimannus Novocomensis