Annus
2 0 0 6


BAGDAD -

De caede puerili

Quinque puellae Iraquicae, quarum una modo nata, Ramadi, in urbe a Bagdato haud longinqua, die Lunae interfectae esse referuntur: nam milites USAe, dum cum rebellibus armatis dimicant, ex armato curru polybolo diu percusserunt. Narrant auctoritates Americanae, quae caedis copiis suis tribuerunt, proelium ab armatis de domus cuiusdam tecto ortum esse, qui contra manipulum igneis armis conicere coeperunt. Currus armatus ictibus milites defendere conatus est, deinde per aedifiicium caute exploratores pervestigantes quinque puellas unumque virum enectos invenerunt. Mulier quaedam ibidem vulnerata in nosocomium pervehi noluit, omnes vero armati evanuerunt, quorum unus vulneratus erat.

Dux Americanus Bryan Salas funestum diem istum appellavit, rebellibus cruoris effusi culpam tribuens, qui eo confugerant; auxilia quidem orbatis familiis praebitum iri.

Scripsit Herimannus Novocomensis



Retro ad:

Novissima editio
Summum paginae