De futuro ministro primario Palaestinorum

Mohammad al-Shbeir narratur summus Palaestinorum moderator fore: de viro concordes et praeses Palaestinorum Abu Mazen et Ismail Haniyeh, rector primarius Hamas factionis qui nuper officio se abdicavit, convenerunt. Qui ambo etiam de rebus a futuris moderatoribis agendis pactionem fecerunt. Nomen Mohammad al-Shbeir, a factione Hamas propositum, libenter Abu Mazen accepisse fertur.

Iam diu post populi suffragia parti tantum Hamas favent moderatores populi Palaestini, sed graves difficultates rectoribus talibus USA et pleraeque civitates occidentales opposuerunt: nam factio illa sanguinariis gregibus nimis amica esse putatur. Denique constituerunt duces Hamas commune rectorum consilium cum factione al-Fatah condere, ut poenae a ditioribus civitatibus impositae leviores fierent. "Spes mihi est - ait hodiernus moderator summus - mox populum Palaestinum ab ambarum partium ministris rectum iri."

Mohammad al-Shbeir ut rector universitatis Gazae inter Palaestinos celeber factus est.

Scripsit Herimannus Novocomensis