Democratas e comitiis Americanis victores discessisse

Die Martis Americani novum consilium publicum creaverunt: Democratae evidenter Republicanos superaverunt. Cum enim Republicani ante comitia habita 232 suffragia Democrataeque 202 habuerint, Democratae nunc 228 suffragia, Republicani autem 196 obtinent. Itaque Georgius Bush, qui Americanis etiamnunc praeest, se valde afflictum esse dixit et culpam huius rei praestare. Praeterea Donaldum Rumsfeld administrum defensionis dimisit, quia res in Iraquia non satis bene procederent. Quo Democratae victores se valde contentos praebuerunt dicentes, si voto Americanorum Rumsfeld munere motus esset, comitia iam usui magno fuisse. Tamen Bush affirmavit se rationes agendi non penitus mutaturum esse, immo "Hostes", inquit, "non iubilarent. Populo Iraquensi dico: Nolite timere. Et copiis nostris: Nolite dubitare, quin Americani vos semper adiuturi sint."

Sed Republicani non solum in consilio publico maioritatem suffragiorum amiserunt, verum etiam in senatu, in quem Americani 33 novos senatores lexerunt. In his iterum est Hillaria Clinton uxor Billi Clinton, qui Americanis ante Georgium Bush praefuit, et Eduardus Kennedy frater illius Joannis F. Kennedy, qui anno 1963 interfectus est. Atque etiam Arnoldus Schwarzegger ille actor celeber Hollyvoodianus Californiae iterum gubernator praeerit.

Causae cladis Republicanorum et bellum Iraquense et crimina corruptionis stuprique esse videntur. Atque Harrius Reid, qui Democratis in senatu praeest, dixit sententiam democratarum praesidenti nunc audiendam esse. Nam ad tria milia militum Americanorum iam bello Iraquensi, quod septimanatim tria millies centenis millibus Dollariorum constaret, interfecta esse. Itaque haec post comitia ventum mutationis in America flaturum esse. Quod erit demonstrandum ...

Scripsit Stefanus Weise Halensis