Cancellariam Germanam et administrum principem Britannorum novum pactum aeris caelique protegendi facere velle

Cum Angela Merkel cancellaria Germana cum Antonio Blair administro principe Britannorum Londinii convenisset, dixit se et Blair in eo consentire, quod novum pactum aeris caelique protegendi necessarium putarent. Nam mutationem aeris caelique hominibus saeculi XXI problema maximum fore. Merkel et Blair novum pactum pro actis Kyotensibus, quippe quae solum usque ad annum 2012 valeant, inire cogitant. Cancellariae enim persuasum est homines excitandos esse, ut problema cognoscant. Praeterea Europaeis occasionem datam esse, ut hoc pacto se aliis nationibus duces praeberent. Itaque dum Germani unioni Europaeo et consilio VIII superiorum nationum oeconomicarum a Kal. Ianuariis anni sequentis praesint, se huic rei imprimis operam daturam esse. Atque Blair putat Americanos quoque persuaderi posse, ut se pacto huic adiungant. Ad hunc enim diem Americani acta Kyotensia non acceperunt. Blair ipse iam antea Britannis anno proximo unionem Europaeam consiliumque VIII superiorum nationum oeconomicarum gubernantibus imprimis calefactionem terrenam et pauperiem Africanam domare studuit. Itaque Merkel ad extremum dixit se inde pergere posse, ubi Britanni finem fecissent.

Scripsit Stefanus Weise Halensis