Iraniam poenis forsitan affectum iri

Legati sex potentissimarum civitatum Londinii de poenis a Perside petendis agunt, nam regimen Persarum in vi nucleari utendo denuo perseverat: Francogallia, Regnum Coniunctum, USA, Russia et Sinae cum Germania convenerunt. Etsi nationes quae communismum cognoverunt colloquia et pactiones habendas esse reputant, omnes de Irania punienda disputabunt antequam res in ONUs conventu agatur, postquam Consilium Securitatis iam uranii ditationem desinendam esse deliberaverat.

Praefectus Unionis Europaeae rebus exteris addictus Xaverius Solana ianuas pactionum etiam nunc patere dixit, sed finis aliquando colloquiis imponendum esse. Nationes quae Londinii convenerunt Persidis rectoribus auxilia promittunt, si ab uranii ditationem desistant. USA et Regnum Coniunctum, quae severius rebelles punire moliuntur, postulationes suas moderare possint, ut Russiam Sinasque secum trahant. Exempli gratia, itinera legatorum Persicorum magis ardua effici possint vel machinae ad vi nucleari utendum aptae non amplius Persidi venum dari possint.

Minister Russicus rebus exteris addictus Sergius Lavrov contra colloquiis tantum rem solvere vult, itemque legati Sinenses: reputant observatores hanc opinionem ex opera communi Russiae cum Irania ad officinam robori nucleari gignendo aptam exstruendam et ex olei ductis Sinensium per Iraniam transcurrentes ortam esse.

Scripsit Herimannus Novocomensis