Iuvenes vestimentîs sanguine oblĭtîs induti tutamen petentes in pavimentum se iecêrunt aut terrore Panico correpti ex aedificio scholari cursitavêrunt in vias propinquas. In televisorio visum est scalâs introitûs madêre lacu sanguinis. Paedagogus dixit se audivisse 20 (viginti) ictûs sclopetarios. Sclopetationem factam esse circiter per semihoram. Yvan Delorme praeceptor astynomorum Regiomontanus rettulit deinde virum suspiciosum sclopetando necatum esse a quodam astyphylace.

Discipulîs quamvis terrore commotîs tamen aliquatenus feliciter accidit: „Si res" magister inquit „facta esset quinque minutîs postea, etiam multo fuisset peior – nam eo tempore discipuli mutassent oecos classium".

Iuvenis mulier rettulit se cum amicâ foris stetisse et sigarellum fumasse, cum ille vir furore correptus coepisset huc illuc sclopetare: „Iste advênit nigro pallio fossario (Angl. trenchcoat) nigrîsque caligîs indutus, comptu capillorum isto furioso, necnon secum gessit ingens sclopetum polybolum. Aspectum praebuit alicuius imaginis horrificae, isto nigro pallio fossario et cutis perforationibus et vestimenti clavulis aliisque rebus insolitis".

Etiam Derick Osei 19 annos natus terribilia expertus est: "Iste vir se abdidit post automatum venditorium et deinde apparuit cum sclopeto eodemque genae apposito ad me collineavit. Tum per scalâs me proripui. Vîdi puellam, cuius pes est violatus".

Astynomi dixêrunt virum facinus commisisse singularem. Eundem sclopetatorem amucianum 25 annos natum oriundum esse e regione Regiomontanâ. Causam sceleris usque nunc non esse nôtam, adhuc perquîri homicîdae habitaculum. Eundem non fuisse tromocratam pro certo habent.

Delorme praeceptor astynomorum dixit homicîdam secum habuisse tria tela, quorum unum esset automaticum. Testes oculati rettulêrunt eundem virum comptu capillorum Irocesiano insignem primo ante aedificium sclopetasse. Deinde per introitum praecipuum in collegium introgressum in cafêo secundi tabulati ultro in homines sclopetasse.

Quomodo et a quot sclopetatoribus hic cursus amucianus factus esset, primo narravêrunt alii aliter. Primo nonnulli diurnarii rettulerant necatos esse quattuor homines. Praeterea astynomi in initio opinati erant fuisse complures sclopetatores. Necnon relatores cuiusdam stationis televisifici contenderant unum e sclopetatoribus sclopeto suo se ipsum necavisse.

Astyphylaces speciales canibus collegium perscrutati sunt, ut invenirent homines afflictos. Plerosque discipulos loca scholae reliquisse. Necnon evacuata esse duo megapolia (Angl. super markets) et nepiagogia (Theod./Angl. kindergarten) et stationem traminis subterranei, quae prope sita essent.

Stephanus Harper praeses Canadae ministerialis dixit factum esse actum violentiae vanum ignavumque. Sclopetatione homines commonefacti sunt caedis multiplicis a.1999 in Scholâ Columbînâ altiore factae, quae sita est in Civitate Americae Colorâtâ. Eâdem in caede, quam duo discipuli item palliîs fossariîs induti perpetravêrunt, necati erant 13 homines. In fine interfectores interfecerant se ipsos.

In locîs Collegii Dawsoniani 4,8 hectareas magnîs instituuntur circiter 10.000 (decem milia) discipulorum. Quae schola a.1969 condita, in qua institutio fit linguâ Anglicâ (non Francogallicâ) adhibitâ – quae est huiusmodi omnium in provinciâ Québec sitorum maxima – etiam est schola gradûs superioris scholaque professionum.