Saddamum nullum vinculum cum Al Qaeda habuisse

Consilium illud senatorium, cui USAe senatus munus de institutis occulte investigantibus exquirendi commiserat, collegit Georgium Bush eiusque ministros bellum Iraquiae intulisse sine ullo argumento, unde certum inter Saddamum Hussein et Al Qaedam vinculum conici posset. Magis et magis arduum est responsum praesidentis USAe Georgii Bush, qui pertinaciter Iraquiam et caedium immanium mensi Septembri MMI perpetratatrum et letalium armorum absconditorum accusaverat, ut coram toto orbe belli causam interponeret.

Scripta senatoria praeterea Saddamum Osamam bin Laden ut inimicum habuisse narrant, extremistas Islamicos regimini suo minitari censuisse, saepe auxilia et subsidia petita iisdem denegavisse.

Cur denique bellum in Iraquiam illatum est? Acta diurna populusque USAe causam cruentissimi belli in dies vehementius postulant. Suffragiis Novembribus, quibus senatus partim renovabitur, praesidenti cladem ingentem afferre possunt.

Scripsit Herimannus Novocomensis