Nudius tertius principalis Hezbolae auctor, H. Nasrallah regulus, cuius iussu II milites Israeliani abducti erant, his verbis suam ipsius fertur indicasse culpam: "Nequaquam, inquit, pro iure hominum, pro rationibus tam moralibus, quam politicis, oeconomicis socialibusque..., nequaquam II istos Israelitas abducendi imperium dedissem, si praevidissem, huiusmodi facinore facto, tantam straginem oriri posse". Nam ab hoc bello accenso, priore mense contentionum, Libanus 1100, Israel 136 amissit homines, viis fontibusque Libani corruptis, destructis pontibus, portubusque classis Hebraicae interventu prohibitis.

Heri, quindecima indutiarum lapsa die, in urbem Beirut, per calles plateasque dirutas, vicos missilibus deletos, ceteraque documenta irae, bene de ONU meriti secretarii K. Annan adventus nuntiatur, qui pacem adhuc infirmam curet, cessationemque armorum prospiciat. Igitur populus, qui partibus Hezbolae studet, re animadversa in plateas prodit. Inspecta meridionali civitatis regione, dominus Annan demonstrat fore, ut praeter difficultates omnia bene cedant, si reguli principesque implicatarum partium pollicitationes construendi agant. Eam ob rem hoc iter Orientis paravisse, et Ierosolyma visitare, et usque ad Persas ire se velle, salutatum primo ab initio magistaratus eius rei publicae Islamicae consulem (M. Ahmadinejad, acerrimum inimicum Israel, cuius civitatem de charta geografica delendam dictitat) eundemque rogare, uti ad colloquia de pace in Medio Oriente componenda accedat. Praeterea 15000 militibus ab ONU in Gallia et Italia delectis, in hanc regionem mittendis, otium firmum reversurum videri... Cum vero de armis Hezbolae deponendis loqueretur, Annan, vituperatus a turba, praesentis populi ululatus et convicia recepit.

Hodie, cum 29 dies Augusti lapsi essent, per calles plateasque Ierosolymorum, ubi populus reclamabat auctoritatibus, qua ratione hoc bellum ductum esset, ut adeo adversum cesserit, introitu in colloquium facto, K. Annan consalutatis principibus proposuit, ut quam primum remota classe concedant Libanensibus portubus uti. Ceterum illi ab initio negaverant se classem a portubus esse remoturos, nisi prius sectatores Hezbolae in Libano viventes deposuerint arma.

Scripsit Carolus Petreius Bogotensis