Monzonum saevitia quattuor Indorum civitatibus potita, ter centum vitas, atque 860.000 -secundum postremas censorum rationes- domos abstulit.

Civitas est ad meridiem, quae vocatur Andhra Pradesh, rapidis nuper vexatissima nimbis, ubi procellarum impetus reliquit 540.000 mortales sine laribus, centum sine vita, multis iugeribus laetorum attritis arvorum, atque 70.000 habitationibus per municipia vitiatis, dum Helicoptera 10, totidemque navigia classica ad superstites excipiendos legantur, simul aquae potabilis, escae, medicinae afferendae gratia, semimersas villas accedunt. Interim Sonia Ghandi, quae Indici Congressus ordini praeest, ministerque ab interioribus, nomine Shivraj Patil, per vastatas alluviis regiones grassantes, facta hactenus detrimenta 180 millionibus euronum aestimant.

Altera est ad Occidentem Indorum civitas, quae vocatur Gujarat; ibi 190 millia hominum coguntur relinquere Surat, claram adamantum officinis urbem, cuius praefectus custodiae ducendae, Sudhir Sinha, aestimat fore, ut locus deterior fiat, sex iam capitibus alluvie absumptis, novasque procellas minante caelo. Afflicto populo est quaerenda salus ascensu facto in reluctantia tecta domorum. Damnata via ferrea, tramina interrupta.

Proxima huic pernicies, in civitate Maharashtra, mille homines domos vacuefacere coacti, classicis aeroplanis provincias circumvolantibus, demittentibus medicamina et escam; hic defunctorum numerus in 62, sine domo relictorum in 105.000 crevisse fertur.

Postremo parva in civitate Chattisgarh, quae praeter tumultum aquarum, maoistarum quoque rebellium tempestatem fert, 20.000 homines confugiunt in agros, quorum 23 vario casu pereunt.

Scripsit Carolus Petreius Bogotensis