Serbi et Kosovari una congrediuntur

Primum post memoriam hominum die Lunae Vindobonae una convenerunt viri politici maximi momenti Serbiae et Kosoviae, ut de statu futuro huius nunc protectorati Organisationis Nationum Unitarum (ONU) et olim provinciae Serbicae colloquantur. Progressus tamen, qui ad compromissum inter ambos manus ducat, proximo in tempore non exspectatur.

In Vindobonam advenerunt praesidens et minister primarius Serbiae - Boris Tadic et Vojislav Kostunica - necnon iis respondentes functionarii Kosovienses - Fatmir Sejdiu et Agim Ceku. Illi voluntatem Serborum, hi Albanorum - qui plus quam 90% hominum in Kosovia habitantium continent - partem agunt in sermonibus, qui - ita saltem ONU sperat -usque ad finem huius anni solutionem crisi apportere debeant. Flagitationes tamen ambarum partium tam a se invicem remotae manent, ut dificillime compromissum aliquod hac in re nunc imginari possit: Serbi admittere volunt Kosoviae statum 'maximae autonomiae politicae', dummodo de iure intra fines Serbiae regio haec maneat; Kosovari tamen nullam aliam rem cupere putantur praeter plenam independentiam Kosoviae. Desinite, quaeso, cogitare de aliqua nova civitate, quae 15% superficiei Serbiae contineat - dixit diurnariis Bellogradi, ante volatum in urbem capitalem Kosoviensem Pristinam, minister primarius Kostunica (quem hic in photographemate videre, lector care, potes).

Kosovo protectoratus ONU pronuntiata est post rebellionem bellatorum clandestinorum manus Albanorum UCK necnon ictus aerios exercituum terrarum NATO in Serbiam anni 1999.

Scripsit Krakauer