Finale binorum Prasinorum

In poenariis demum ludi finalis certaminis pedifolii mundani Itali Francogallos in stadio Berolinensi superaverunt.

Primus in septima minuta portam hostium violavit 34 annorum Zinedine Zidane (cui id ultimus in curriculo ludus pro patria erat) ictu poenario, perdolose sclopetans ita, ut portator Italus Buffon ad locum exspectatum se iactavit antequam... pila a pede Zizou tacta esset!

In 19. minuta primae dimidiae ad 1:1 effectum ludi aequavit Marco Materazzi - cuius delictum (si vere erat, nam res non certa multis videbatur) causa poenarii fuerat - capite perpulchrum ictum in portam portatoris Gallorum Barthez pulsans.

Altera in dimidia etiam incerto Marte ludebatur, nunc tamen ullis sine follibus in porta. In certamine additionali multo actuosiores Francogalli luserunt. In 110 minuta Zidane, in parva pausa ludendi, ignotam ob causam crudellissime capite suo percussit Marcum Materazzi in pectus, quam ob rem nota rubra donatus Zizou est et per ultimas 20 minutas Prasini (Les Bleus) Galli 10 tantum lusoribus luserunt. Maxime fessi tamen Prasini (Azzurri) Itali non potuerunt occasione uti.

In poenariis usque ad quintum ictum Sors haesitabat, denique tamen palmam Italis praebens.

Scripsit Kika Halavi