Iudices supremos USAe tribunalia bellica minime legitima censuisse

Iudices supremi USAe consilium praesidentis Georgii Bush iniustum censent, tribunalia bellica constituendi ut captivi carceris Cubani apud sinum Guantanamo detenti aliter atque ceteri iudicentur: ius enim Genavae conventionis ibi magnopere gravissime esse, nullam facultatem sententias libere dicendi iudicibus istis datam esse, quod neque ius bellicum Americanum neque conventio universalis de captivis bello comprehensis servata sint, ipsosque sub praesidentis dicione sententias dicere. De singulo captivo agebatur: nam Salim Ahmed Hamdan, vir Yemeniae qui autoraeda ipsum Osama bin Laden circumvehere solitus fuit, coniurationis accusatus, per patronos suos iudices ad legem iudicare negavit: de qua re tribunali alii Americano posthac sententia pronuntianda est.

Sed Georgius Bush nullo dubio permotus confirmavit "se minime interfectoribus libertatem restituturum esse, vitam concivium suorum in discrimen adducentem": cum senatoribus rationem creandam esse "de actionibus adversus pugnatores hostiles apud Guantanamo comprehensos", quod sententia libertatem reis restituendam esse minime constituat.

Ex CCCCL captivis Guantanamo carceris (quorum nonnullos in imagine aspicis) decem tantum insimulati sunt, nemo autem caedium XI Septembris MMI perpetratarum.

Scripsit Herimannus Novocomensis