Paradisus Slovacus in periculo

His proximis horis praesidens Slovaquiae Ivan Gasparovic rogaturus sit - si credendi sint diurnarii huius terrae - populistam Robertum Fico (in photographemate), ut novum regimen creet.

Factio 41 annorum Roberti Fico Smer (Directio) victor discessit e suffragiis parlamentariis ultimo die Sabbati habitis, plus quam 29% suffragiorum colligens. Alteram palmam cepit Unio Democratarum et Christianorum ministri primarii Nicolai Dzurinda (18.4%), quae factio tamen invitata in regimen novum a Fico verisimiliter non erit. Aliter omnis fere coalitio fieri potest - Smer cum Hungaris Slovaquiensibus aut cum nationalistis (SNS), qui Hungaros, qui decem partem populationis contineant, aperte oderunt. Haec factio, quae ultimis quattuor annis extra parlamentum manebat, nam limen 5% suffragiorum anni 2002 transgredi non potuisset, nunc ut tertia vis civitatis cum 11.7% suffragiorum revertitur. Una cum his necnon alteris populistis motus HZDS pristini ministri primarii Vladimiri Meciar (8.8%, multo minus effectu expectato) maiorem partem sellarum Smer capere possit.

Una res manet certa: reformationes audaces oeconomicae a regimine Dzurindae introductae, quarum effectu oeconomia terrae citissime ultimis in annis crescere coepit, nullo modo duce Fico sustentandae sunt.

Scripsit Krakauer