Permagna civium Hispanorum multitudo negotiationem cum tromocratis firmiter recusavit

Heri vesperi die 10 mensis Iunii permagna multitudo ab quibuscumque locis Hispaniae proveniens, quae circa milionem reclamantium complevit, praecipuas Matriti vias percucurrit recusans consilium nuper a praeside Iosepho Ludovico Rodriguez Zapatero nuntiatum, is qui conventu agendo cum illegitimo grege nomine Batasuna (qui politica manus gregis tromocratici nomine ETA a Hispani Supremi Tribunalis iudicibus firmiter declaratust) aperte favet.

Hispanus enim praeses necnon eius imperii socii affirmare videntur maximam Hispanorum partem nihil exoptare nisi diuturnam pacem, ita ut, dum eam adipiscantur, parvi momenti fiat quibus auxiliis scopus is adimpleatur. Aliter autem permulti Hispani -dimidium civium creditur- censent, ei qui putant leges servandas esse, et saepe recordari videntur Hispaniam nullo bello pati, qua re parum proprium de pace quadam loqui fore existimant. Quibus enim civibus omnis res in armorum relictione et veniae petitione victimis vi excruciatis posita est.

Manifestatio enim ea convocata erat a Victimarum Societate Terrotistici Vis (AVT), quorum in numero homines mulieresque, qui violentiam tromocraticam abhinc quadraginta annos passi sunt, ipsi atque eorum familiae, numerantur, praeclaris personis Partium Popularium necnon ipsarum Partium Socilistarum, eae quas penes imperium civitatis est, comitantibus.

Putant ergo manifestantes nullam causam inesse ut grex Batasuna tali privilegio gaudeat, nullis a tromocratis condicionibus adhibitis monstratisque (nulla excusatione ob mortuos -in numero nongentos- necnon laniatos, nulla obligatione armorum deponendorum, nullis flagitationibus -eisdem atque semper- remotis, id est: libertate atque annexione regionis nomine Navarra, ipsis Navarraeis civibus invitis), quae alias iudicare patiantur.

Praeses ergo AVT, cui nomen Franciscus Ioseph Alcaraz, "se plurimosque Hispanorum putare pactationem cum tromocratis nihil aliud esse nisi veram claudicationem vel deditionem civitatis totius ante gregem tromocraticum" aperte declaravit. "Flagitamus enim ut moderatores Hispaniae nullo more terroristico imperio cedant, nec negotiationem ullam cum Batasuna-ETA faciant, necne ETA concedant id quod ea abhinc 38 annos mortium necumque non adepta est"

Xavierus Gismero autem, homo militaris quidam die 11 mensis Martii laniatus, ceterum flagitavit "ut veritas de maximo ictu terroristico in Hispania habito tandem refulgeat, nam aenigmata explanatione egentia de auctoribus atque finibus illius caedis plurima manent". Permulta enim facinoris illius indicia atque argumenta hodierno die manifeste falsa atque tergiversata esse apparent, solis quibusdam ephemeridibus investigantibus atque innumerabilibus discrepantiis cum officiali sententia repertis, moderatoribus Hispanis -ita ut permulti cives pro aperto habeant- nihil facientibus ad aptam explanationem adipiscendam.

Moderatores autem Hispaniae, Ferdinando Moraleda, Secretario de Officiali Communicationi curante atque loquente, "dolent ob hypocrisim a ducibus Partium Popularium monstratam, ei qui nunc dialogum cum ETA recusent, sed eum non recusarint eo tempore ubi Ioseph Maria Aznar imperium obtinebat". Non desunt autem qui meminerint Aznar cum ETA dialogavit, sed seorsum, quasi in secreto, numquam palam, publice et officiose, sicut Rodriguez Zapatero acturus est, eo pacto quo tromocratae se legales atque legitimos interpretes voluntatis populi atque dominationis civilis fieri fore credant.

Hac enim conventione facta atque iudicata, nihilominus moderatores Hispaniae conventuros Batasuna nuntiantur.

Scripsit Ansgarius Legionensis