Mons Niger independens

Secundum nuntium a legato Unioni Europaeae die Lunae divulgatum, vix maior pars um exitum referendi civium Montis suffragantium Montis Nigri consensum dedit. Civibus Montis Nigri, terrae parvae in litore Maris Adriatici positae, ubi circa 650 milia hominum habitant, decernendum erat utrum sui iuris civitas esset (sicut fuerat ante annum 1919), an maneret porro in foederatione cum quindecies se maiore Serbia, quae ambae terrae in unione erant, postquam aliae res publicae pristinae Iugoslaviae - Slovenia, Croatia, Bosnia et Macedonia - omnes annis 1991-92 independentiam a regimine Singidunensi (Belgradensi) pronuntiaverant. Regimen Montis Nigri praeside Milo Djukanovic iam anno 2003 referendum de independentia habere voluit, tunc tamen ab Unione Europaea coactum est tribus novis annis in "matrimonio" cum Serbia manere.

Hornotino demum anno referendo perficiendo assentiens, Commissio Europaea flagitavit tamen 55 saltem centesimas (non ergo 50%, ut ubique solet) suffragatorum pro independentia voces dare debere, ut sui iuris civitatem Montem Nigrum esse Unio Europaea agnosceret. Quae res, secundum primos effectus suffragandi, non eveniy: contra independentiam enim suffaragati sunt omnes Serbi hic habitantes (ca. 32% populationis), pars (quamquam minor) erat, - Mahumetanorum regionis Sandjak necnon nonnulli ipsi Montenegrini, qui scilicet nodis familiaribus aut quibusdam negotiis cum Serbia sint iuncti. Sed denique legatus Unionis Europaeae Frantisek Lipka confirmavit suffragia pro libertate patriae 55,4% attigisse.

Scripsit Herimannus Novocomensis