Caedes Armenorum condemnanda

Parlamentum Francogallicum disceptationem aperuit, qua condemnetur caedes centenorum milium Armenorum a militibus Turcicis tempore primi mundani belli peracta. Si senatus consultum de hac re suffragiis vincetur, iure punietur in Francogallia, qui neget homiciudium hoc factum esse. Decretui adoptando maxime reclamat regimen Turciae.

Nova lege, si introducetur, negatores caedis Armenorum multa 45 milium euronum necnon unius anni carcere puniri poterunt, sicut nunc - quamquam rarissime - puniuntur negatores holocausti Iudaeorum tempore alteri belli mundani peracti.

Agitur de morte 1-1.5 milionum civium Armenorum, qui vita privati sint iussu regiminis Neoturcici (ut nominari solebat) ducum generalium Turcorum annis 1915-17. Turci econtra clamant victimarum numerum multo minorem fuisse, circa scilicet 300 milia, at minime caede, sed in pugnis hos omnes necatos. Agerent enim tunc Armeni bellum clandestinum contra Turcos ac hostibus Turciae principalibus, militibus scilicet Russis, faverent. Rerum gestarum periti terrarum occidentalium plus tamen versioni Armenorum credunt.

Offensa Turcia legatum e Lutetia Parisiorum domum ad tempus revocavit. Antea caedem Armenorum condemnaverunt parlamenta aut regimina Russiae, Graeciae, Suetiae, Canadae necnon Poloniae.

Scripsit Krakauer