De instanti vulcani Indonesiani eruptione

Millia hominum, qui in clivis Merapis vulcani Indonesiani habitant, ab auctoritatibus domo amota sunt: postquam tonitrua ex montis visceribus per aliquot hebdomadas resonaverunt, liquefacta et candentia saxa cum cinere torridisque lapillis de vertice defluere coeperunt. Senes mulieres pueri in loca tuta ad tempus delati sunt, sed nonnulli incolae agros, pecua et bona sua relinquere nolebant.

Die tertio et decimo mensis Maii nuper coepto praeses Instituti Indonesiani vulcanis observandis addicti res ad "punctum rubrum", id est ad summum periculum, pervenisse nuntiavit omnesque incolas ab domibus deferendos esse: quod militaribus raedis etiam per vim effectum est. Candens rivus, dum vapores venefici emittuntur, continenter defluit: studiosis et incolis tantum exspectatio manet. Omnes postremae internecivae eruptioni animum verterunt: anno MCMXXX mille et trecenta homines mortem obierunt.

Scripsit Herimannus Novocomensis