Annus
2 0 0 6


Generalis classis aeriae Michael Hayden nominatus est a praesidente USA Georgio Bush rector novus maximi momenti manus speculatoriae

Novus moderator CIA

Generalis classis aeriae Michael Hayden nominatus est a praesidente USA Georgio Bush rector novus manus speculatoriae maximi momenti Americanorum CIA. Ante duos dies munere hoc, quo duobus ultimis annis fungebatur, inopinate abdicavit Porter Goss; causa abdicationis publice non divulgata est.

Nominationem probare nunc debeat senatus USA, cuius consilium re vera praedici non potest, nam multis senatoribus - etiam factionis Reipublicanae, quae praesidenti alioquin favet - non placet virum militarem (est enim Hayden generalis quattuor stellarum) praeesse societati civili, sit licet speculatoria. Non bene etiam a multis aestimatur Hayden, quod anno 2001, post ictus tromocratarum contra urbes New York et Washington, tunc praeses Sedis Securitatis Nationalis (NSA), iussu praesidentis Bush sed sine concessu iudicum, ut lege fieri deberet, iussit opificibus NSA sermones telephonicos civium Americanorum clam auscultare. Haec quaestio, utrum scilicet iuxta an contra legem telephona auscultanda iusserit, nunc denuo a senatoribus disputanda debeat, antequam nominationem probent - dixit, percontatus a statione televisifica Fox News moderator commissionis iustitiae senatus Arlen Spencer.

Ultimo tempore, a mense Aprili anni 2005, Hayden munere fungebatur vicarii praesidis Summae Directurae Speculationum (DNI), cui officium est laborem omnium Americanorum societatum speculatoriarum coordinare.

Scripsit Nanompouphos



Retro ad:

Novissima editio
Summum paginae