Sermones rupti Serbiae cum UE

Unio Europaea suspendit die Mercurii negotiationes cum Serbia de futuro huius terrae statu membri UE, quia regimen Belgradense non potuit usque ad finem Aprilis - quod tempus antea inter ambo statutum erat - capere fugientem generalem Ratko Mladic necnon transferre eum in carcerem Scheveningen Batavorum, ubi omnes clade civium in "bellis iugoslavensibus" patrata accusati iudicium exspectant Hagensis pro omnibus nationalibus tribunalis.

Regimen Serbicum explanat se omnibus opibus conatum esse fugientem generalem - accusatum iussi necandi 7 milium Musulmanorum civium inclaviae Srebrenica necnon aliarum caedium civium Bosnensium tempore belli 1992-96 patratarum - capere, id tamen facere non posse. Praeses Tribunalis Hagense Carla del Ponte putat tamen id falsum esse. Quomodo res se vero habeant, difficillime sit iudicare, pro certo autem scitur regimen Belgradense ante duos tresve menses in "artiore contactu" cum Mladic remansisse, eumque rogans, ut ipse se iustitiae daret.

Rebus ita stantibus, integratio in unitam Europam regionis Balcanicae remanet incerta, vicina Bosnia et Hercegovina exspectante similes fortasse difficultates, nam in eorum terra putatur iustitiam internationalem fugere alter tempore belli dux civitatis Serborum Bosnensium eiusque tunc praesidens Radovan Karadzic. Integratio autem Macedoniae et Albaniae non cito progreditur ob difficultates oeconomicas harum terrarum - dici tamen debeat eas, cum tota regione Balcaniae Occidentalis, ultimis 6-7 annis crescere gradu annuali 4-6% productus domestici, multo igitur citius, quam "Europa vetus".

Itaque ob impossibilitatem (si vera est?) duos homines fugientes capere fieri potest, ut citius Turcia Unionem Europaeam intret, quam nonnullae terrae Balcanicae.

In photographemate videtis gen. Ratko Mladic anno 1993 ad armistitium cum Musulmanibus negotiandum venientem in aeriportum Saraievensem.

Scripsit Vasiliu Dumitrescu