Die Veneris, id est decimo sexto die expostulationum publicarum fautorum partis adversae democratiae in Nepalia reinstituendae, rex Gyanendra promisit populo se potestatem exsecutivam factionibus politicis redditurum rogavitque moderatores septem maiorum factionum ut candidatum communem ad munus ministri primarii quam celerrime eligerent.
Tempore expostulationum in viis urbium principalium huius terrae Himalaianae - Kathmandu, Pokhara et Chandragadi - habitarum, in pugnis cum vigilibus publicis decem saltem reclamatores vitam amiserunt. Ultimae tres quattuorve victimae modo die Mercurii necati sunt - regimen regis explanat vigiles se sclopetando defendisse a turba eos appropinquantiun lapidibusque necnon armis ignivomis petentium, cui rei tamen testes ocularii negant.
Expostulatoribus, inter quos praesertim studentes iuvenesque inveniuntur, auxilia allata sunt ab operariis, quorum societates ultima septimana operistitium generale in tota terra pronuntiaverunt.
Gyanendta privavit regimen potestate dictaturamque introduxit mense Februarii 2005 ob necessitatem - ut dixit - bellum cum rebellatoribus clandestinis manus Maoisticae melius gerendi. In bello civili inter milites regiminis et Maoistas spatio ultimorum decem annorum plus quam 13 milia hominum occisi sunt. Primis in diebus expostulationum regimen regis accusabat turbas reclamantium, quod a rebellatoribus istis ideologiaque eorum ducti sint.
